ဇီဝဒီဇယ်ဆီလိုအပ်ချက် မြင့်တက်လာခြင်းနှင့် အရှေ့တောင်အာရှတွင် ထုတ်လုပ်မှုဆိုင်ရာ စိန်ခေါ်မှုများ တိုးပွားလာခြင်းတို့ကြောင့် စားအုန်းဆီဈေးနှုန်းများသည် လပေါင်း ၂၀ ခန့်အတွင်း အမြင့်ဆုံးအဆင့်သို့ ရောက်ရှိခဲ့သည်။ ၂၀၂၆ ခုနှစ်၊ ဩဂုတ်လ ၂၀ ရက်တွင် မလေးရှား၊ ကွာလာ လမ်ပူ ဈေးကွက်၌ စားအုန်းဆီကြိုပွိုင့် FOB ဈေးနှုန်းသည် တစ်တန်လျှင် မလေးရှား ရင်းဂစ် ၄,၉၂၇ (အမေရိကန်ဒေါ်လာ ၁၂၁၈ ခန့်) အထိ မြင့်တက်ခဲ့ပြီး၊ ၂၀၂၄ ခုနှစ် ဒီဇင်ဘာလနောက်ပိုင်း အမြင့်ဆုံးဈေးနှုန်းဖြစ်ကြောင်း Ukr Agro Consult သတင်းဌာနက ဩဂုတ်လ ၂၀ ရက်တွင် ဖော်ပြထားပါသည်။
စားအုန်းဆီဈေးနှုန်းကို ထောက်ပံ့ကူညီနေသည့် အဓိကအချက်တစ်ခုမှာ အင်ဒိုနီးရှား နိုင်ငံ၏ စားအုန်းဆီ အချိုးအစား ၅၀ % ပါဝင်သည့် ဇီဝဒီဇယ်ဆီ မူဝါဒဖြစ်ပြီး စားအုန်းဆီ အသုံး ပြုမှုပမာဏကို တိုးမြှင့်စေလျက်ရှိသည်။ အင်ဒိုနီးရှားသည် ကမ္ဘာ့အများဆုံး စားအုန်းဆီထုတ် လုပ်သည့်နိုင်ငံဖြစ်ပြီး ကုန်ကြမ်းများကို ပြည်တွင်းလောင်စာဆီ ထုတ်လုပ်မှုဘက်သို့ ပိုမိုခွဲဝေသုံး စွဲခြင်းက ကမ္ဘာ့ဈေးကွက်သို့ တင်ပို့နိုင်မည့်ပမာဏအား လျော့ကျစေနိုင်ကြောင်း သိရှိရပါသည်။
တစ်ချိန်တည်းမှာပင် ခြောက်သွေ့သောရာသီဥတုနှင့်အားကောင်းလာနေသော အယ်လ်နီညို ရာသီဥတုဖြစ်စဉ်တို့ကြောင့် အင်ဒိုနီးရှားနှင့် မလေးရှားတို့၏ စားအုန်းဆီ ထုတ်လုပ်မှုအပေါ် စိုးရိမ်ပူပန်မှုများမြင့်တက်လျက်ရှိသည်။ ဤရာသီဥတုပုံစံသည် အရှေ့တောင်အာရှဒေသ အများစု တွင် ပိုမိုခြောက်သွေ့သော အခြေအနေများကို ဖြစ်ပေါ်စေလေ့ရှိပြီး ဆီအုန်းအထွက်နှုန်းကို ထိခိုက်စေနိုင်သည်။ အမေရိကန်စိုက်ပျိုးရေးဌာန (USDA)က ၂၀၂၆-၂၀၂၇ ဈေးကွက်နှစ်တွင် ကမ္ဘာလုံးဆိုင်ရာ စားအုန်းဆီလက်ကျန်ပမာဏသည် ၉ နှစ်တာကာလအတွင်း အနိမ့်ဆုံးအဆင့်သို့ ကျဆင်းသွားလိမ့်မည်ဟု ခန့်မှန်းထားပြီးဖြစ်ကြောင်း ဖော်ပြထားသည်။
ထို့ပြင် ပင်လယ်နက်ဒေသမှ နေကြာဆီထောက်ပံ့မှုများအနှောင့်အယှက် ဖြစ်ပေါ်ခြင်းက လည်း စားအုန်းဆီဈေးနှုန်းကို အထောက်အပံ့ဖြစ်စေလျက်ရှိသည်။ ယူကရိန်းနှင့် ရုရှားနိုင်ငံတို့ တွင် မကြာသေးမီက ဖြစ်ပွားခဲ့သော တိုက်ခိုက်မှုများနှင့် ပို့ကုန်ဆိုင်ရာ အခြေခံအဆောက်အအုံ များ ထိခိုက်ပျက်စီးမှုများကြောင့် စိုက်ပျိုးရေးထွက်ကုန် တင်ပို့မှုများ သိသိသာသာ နှေးကွေးသွား ခဲ့သည်။ နိုင်ငံနှစ်ခုစလုံးသည် ကမ္ဘာ့နေကြာဆီ ထောက်ပံ့မှုတွင် အဓိကကျသော နိုင်ငံများ ဖြစ်ကြ သည့်အတွက် တင်သွင်းသူများသည် စားအုန်းဆီအပါအဝင် အခြားသော ဟင်းသီးဟင်းရွက်ဆီ များကို ပိုမိုရွေးချယ်အသုံးပြုလာကြသည်။
ထို့ကြောင့် စားအုန်းဆီဈေးကွက်သည် ဇီဝဒီဇယ်ဆီလိုအပ်ချက်၊ အယ်လ်နီညို ရာသီဥတု ဖြစ်စဉ်ကြောင့် ထုတ်လုပ်မှုအပေါ် သက်ရောက်နိုင်သည့် အန္တရာယ်များနှင့် ပင်လယ်နက်ဒေသမှ နေကြာဆီထောက်ပံ့ပို့ဆောင်မှု အနှောင့်အယှက်ဖြစ်ခြင်းတို့၏ ပေါင်းစပ် အကျိုးသက်ရောက်မှု ကြောင့် ဈေးနှုန်းမြင့်တက်နေခြင်းဖြစ်သည်။ သို့သော် မလေးရှားရင်းဂစ် ငွေကြေးတန်ဖိုးမြင့်တက် လာခြင်းနှင့် ပဲပုပ်ဆီဈေးနှုန်းများ၏ ယှဉ်ပြိုင်နိုင်စွမ်းရှိမှုတို့ကြောင့် ဈေးနှုန်း ထပ်မံမြင့်တက်မှုမှာ ကန့်သတ်ချက်ရှိနိုင်သည်ဟု Ukr Agro Consult သတင်းဌာန၏ ဖော်ပြချက်အရ သိရှိရသည်။
Source: Ukra Agro Consult, 20 August 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)