ထောက်ပံ့ပို့ဆောင်ရေးနှင့် ကုန်ထုတ်လုပ်ခြင်းတို့တွင် တောင်ကိုရီးယားနှင့် ပူးပေါင်းဆောင်ရွက်မည့် ဗီယက်နမ်

          ဗီယက်နမ်စက်မှုနှင့် ကုန်သွယ်ရေးဝန်ကြီးဌာနလက်အောက်ရှိ နိုင်ငံခြားစျေးကွက်ဖွံဖြိုး တိုးတက်ရေးဦးစီးဌာနက စက်တင်ဘာ ၃ ရက်မှ ၅ ရက်အထိ ဟိုချီမင်းမြို့၌ ကျင်းပမည့် Vietnam International Sourcing 2026 (VIS 2026) ပြပွဲတွင် တောင်ကိုရီးယားစီးပွားရေး လုပ်ငန်းများ၏ အင်အားတိုးမြှင့်ပါဝင်မှုသည် ဗီယက်နမ်နိုင်ငံကို ဒေသတွင်းထုတ်လုပ်မှုနှင့် ကုန်ပစ္စည်းဝယ်ယူဖြန့်ဖြူးရေးဗဟိုချက်အဖြစ် ပိုမိုဆွဲဆောင်နိုင်ကြောင်း ဖော်ပြနေသည်ဟု ပြောကြားခဲ့ပါသည်။ ဗီယက်နမ်နိုင်ငံဆိုင်ရာ တောင်ကိုရီးယားကုန်သွယ်ရေးရုံး၏ ပံ့ပိုးကူညီမှုဖြင့် ယခုနှစ် ကိုယ်စားလှယ်အဖွဲ့တွင် အစားအသောက်၊ ထောက်ပံ့ပို့ဆောင်ရေး၊ ဒစ်ဂျစ်တယ်နည်းပညာ၊ အင်ဂျင်နီယာလုပ်ငန်း၊ သင်္ဘောတည်ဆောက်ရေး၊ ရေလုပ်ငန်းနှင့် ဖြန့်ဖြူးရေးကဏ္ဍများမှ ထိပ်တန်းကုမ္ပဏီများ၊ လုပ်ငန်းအသင်းအဖွဲ့များနှင့် စီးပွားရေးလုပ်ငန်းများ ပါဝင်လာမည် ဖြစ်ကြောင်း သိရပါသည်။ တောင်ကိုရီးယားကုမ္ပဏီများသည် ကုန်ပစ္စည်းဝယ်ယူရေးတင်မကဘဲ ကုန်ပစ္စည်းပြသမှုများ၊ စီးပွားရေးလုပ်ငန်းချင်းချိတ်ဆက်ဆွေးနွေးပွဲ (B2B) များ၊ ရင်းနှီးမြှုပ်နှံမှု အခွင့်အလမ်းများနှင့် ရေရှည်တည်တံ့သော ထောက်ပံ့ရေးကွင်းဆက်ဖွံ့ဖြိုးတိုးတက်ရေးတို့မှ တစ်ဆင့် ဗီယက်နမ်လုပ်ငန်းများနှင့် ရေရှည်ပူးပေါင်းဆောင်ရွက်မှုများ တည်ဆောက်ရန် ရည်ရွယ်ထားကြောင်း သိရပါသည်။ ပါဝင်မည့်ကုမ္ပဏီများအနက် HiteJinro သည် အဖျော်ယမကာ ထုတ်ကုန်များကိုပြသရန် ပြခန်းနှစ်ခန်းဖွင့်လှစ်မည်ဖြစ်ပြီး B2B တွေ့ဆုံပွဲများလည်း ကျင်းပ သွားမည်ဖြစ်ကြောင်း သိရပါသည်။ ထို့ပြင် ဗီယက်နမ်တွင် ထုတ်လုပ်မှုတိုးချဲ့ရန် ပြင်ဆင်လျက် ရှိသည့်အတွက် ကမ္ဘာလုံးဆိုင်ရာဖြန့်ချိရေးကွန်ရက်အတွက် ဗီယက်နမ်မှ ပြုပြင်ထုတ်လုပ်ထားသော အစားအသောက်ထုတ်ကုန်များကို ရှာဖွေဝယ်ယူသွားမည်ဖြစ်‌ကြောင်း သိရပါသည်။ ထောက်ပံ့ပို့ဆောင်ရေးနှင့် ထောက်ပံ့ရေးကွင်းဆက်ဝန်ဆောင်မှုပေးသည့် Zenith Union Partners (ZUP) နှင့် KCTC International တို့သည် ဗီယက်နမ်တွင် လုပ်ကိုင်နေသည့် တောင်ကိုရီးယားစီးပွားရေးအသိုက်အဝန်းအတွက် ထောက်ပံ့ပို့ဆောင်ရေး၊ ထုပ်ပိုးမှု၊ Pallet၊ ဖြန့်ဖြူးရေးနှင့် ကုန်ပစ္စည်းဝယ်ယူရေးဆိုင်ရာဖြေရှင်းနည်းများကိုရှာဖွေကာ ထောက်ပံ့ရေးကွင်းဆက်များကို ပိုမိုထိရောက်စေရန်နှင့် နှစ်နိုင်ငံကုန်သွယ်ရေးတိုးမြှင့်ရန် ကြိုးပမ်းသွားမည်ဖြစ်ကြောင်း သိရပါသည်။ ဒစ်ဂျစ်တယ်နည်းပညာကဏ္ဍတွင် တောင်ကိုရီးယား၏ ထိပ်တန်း Cloud Computing နှင့် ဒစ်ဂျစ်တယ်အသွင်ကူးပြောင်းရေးကုမ္ပဏီဖြစ်သည့် Megazone က ဗီယက်နမ်နည်းပညာကုမ္ပဏီများနှင့် ဒစ်ဂျစ်တယ်အခြေခံအဆောက်အအုံ၊ ဒေတာစင်တာများ၊ Cloud Computing နှင့် လုပ်ငန်းသုံးဒစ်ဂျစ်တယ်ဖြေရှင်းနည်းများကဏ္ဍတွင် ပူးပေါင်းဆောင်ရွက်ရန် ရှာဖွေလျက်ရှိကြောင်း သိရပါသည်။ သင်္ဘောတည်ဆောက်ရေးနှင့် အကြီးစားစက်မှု လုပ်ငန်းကဏ္ဍမှ Tims Trading၊ BUFCO နှင့် Korea Marine Equipment Association (KOMEA) တို့သည် စက်ပိုင်းဆိုင်ရာအစိတ်အပိုင်းများ၊ ကုန်ကြမ်းပစ္စည်းများ၊ Flanges၊ Pipe Fittings၊ ရေကြောင်းသုံးစက်ကိရိယာများနှင့် သင်္ဘောတည်ဆောက်ရေး၊ စွမ်းအင်နှင့် ကမ်းလွန်လုပ်ငန်းများတွင် အသုံးပြုသည့်ပစ္စည်းများကို ဗီယက်နမ်မှပံ့ပိုးပေးနိုင်မည့်လုပ်ငန်းများကို ရှာဖွေသွားမည်ဖြစ်ရာ ဗီယက်နမ်၏အင်ဂျင်နီယာစွမ်းရည်များ တိုးတက်လာမှုနှင့်အတူ အခွင့်အလမ်းများ ပိုမိုကျယ်ပြန့်လာကြောင်း ဖော်ပြလျက်ရှိပါသည်။ ရေလုပ်ငန်းကဏ္ဍတွင် Hanawon Fishery သည် ငါးမွေးမြူရေးအစာထုတ်လုပ်ရန် လိုအပ်သောကုန်ကြမ်းများကိုရှာဖွေလျက်ရှိပြီး အခြားကုမ္ပဏီများကလည်း ပင်လယ်စာထုတ်ကုန်များအတွက် ဗီယက်နမ်၏တည်ငြိမ်သည့် ထောက်ပံ့ရေးကွင်းဆက်များကို စူးစမ်းလျက်ရှိကြောင်း သိရပါသည်။ VIS 2026 ပြပွဲကို တောင်ကိုရီးယား၏ အဓိကစီးပွားရေးအဖွဲ့အစည်းများဖြစ်သည့် ကိုရီးယားအသေးစားစီးပွားရေးလုပ်ငန်းများအဖွဲ့ချုပ် (KFME)၊ အသင်းဝင်အသေးစားစီးပွားရေးလုပ်ငန်းရှင်နှင့် လုပ်ငန်းပေါင်း ၇.၃ သန်းကျော်ကို ကိုယ်စားပြုသည့်အဖွဲ့၊ KOCHAM နှင့် ဟိုချီမင်းမြို့ရှိ တောင်ကိုရီးယားကောင်စစ်ဝန်ချုပ်ရုံးတို့ကလည်း ပံ့ပိုးကူညီလျက်ရှိပြီး ပြပွဲကိုမြှင့်တင်ကာ တောင်ကိုရီးယားစီးပွားရေးအသိုက်အဝန်း၏ ပါဝင်မှုကို အားပေးလျက်ရှိကြောင်း သိရပါသည်။ နိုင်ငံခြားစျေးကွက်ဖွံဖြိုးတိုးတက်ရေးဦးစီးဌာန၏ အဆိုအရ VIS 2026 တွင် တောင်ကိုရီးယားလုပ်ငန်းများ အင်အားတိုးမြှင့်ပါဝင်လာခြင်းသည် တောင်ကိုရီးယားကုမ္ပဏီများအကြား ထောက်ပံ့ရေးကွင်းဆက်များကို မတူကွဲပြားစေရန်၊ ဗီယက်နမ်တွင် ကုန်ပစ္စည်းဝယ်ယူရေးကွန်ရက်များချဲ့ထွင်ရန်နှင့် ဗီယက်နမ်ထုတ်လုပ်သူများနှင့် ပူးပေါင်းဆောင်ရွက်မှုများပိုမိုနက်ရှိုင်းစေရန် ကြိုးပမ်းနေသည့်လမ်းကြောင်းကို ထင်ဟပ်စေသည် ဟု သိရပါသည်။ အဆိုပါပြပွဲသည် ဗီယက်နမ်လုပ်ငန်းများအတွက် တောင်ကိုရီးယား၏ ထိပ်တန်းကုမ္ပဏီများ၊ တင်သွင်းသူများ၊ စက်မှုလုပ်ငန်းအသင်းအဖွဲ့များနှင့် ဖြန့်ဖြူးရေးကွန်ရက်များကို တိုက်ရိုက်ချိတ်ဆက်နိုင်မည့် အခွင့်အလမ်းတစ်ရပ်ဖြစ်ပြီး ဒေသတွင်းနှင့် ကမ္ဘာလုံးဆိုင်ရာ တန်ဖိုးကွင်းဆက်များအတွင်း ပိုမိုနက်ရှိုင်းစွာပါဝင်နိုင်ရန် အထောက်အကူပြုမည်ဖြစ်ကြောင်း သိရပါသည်။ ထို့ပြင် Vietnam International Sourcing 2026 သည် ဗီယက်နမ်လုပ်ငန်းများနှင့် နိုင်ငံတကာဝယ်လက်များကို ထိရောက်စွာချိတ်ဆက်ပေးသည့် ပလက်ဖောင်းတစ်ရပ်အဖြစ် ဆက်လက်ရပ်တည်ကာ ပို့ကုန်တိုးမြှင့်ရေးနှင့် ဗီယက်နမ်၏ကမ္ဘာလုံးဆိုင်ရာ ထောက်ပံ့ရေးကွင်းဆက်အတွင်း အရေးပါမှုကိုပိုမိုခိုင်မာစေရန် အထောက်အကူပြုမည်ဟု မျှော်လင့်ထား ကြောင်း သိရှိရပါသည်။

Vietnam Plus                                                                            

DOCA (ရန်ကုန်)