အင်ဒိုနီးရှားနိုင်ငံ၏ အရန်ဆန်လက်ကျန်ပမာဏ တန်ချိန် ၅ သန်း အထိ စံချိန်တင် ရောက်ရှိခြင်း

   အင်ဒိုနီးရှားအစိုးရ၏ အရန်ဆန်လက်ကျန်သည် ၂၀၂၆ ခုနှစ်၊ ဧပြီလ ၂၃ ရက်နေ့အထိ တန်ချိန် ၅,၀၀၀,၁၉၈ သန်း သို့ ရောက်ရှိခဲ့ပြီး ယင်းမှာ နိုင်ငံ၏သမိုင်းတစ်လျှောက် အမြင့်ဆုံး စံချိန်တင် ပမာဏဖြစ်ကြောင်း စိုက်ပျိုးရေးဝန်ကြီး Andi Amran Sulaiman က ကြေညာခဲ့သည်။

    အဆိုပါ ပမာဏသည် ပထမဦးဆုံးအကြိမ်ဖြစ်ကာ မိမိတို့ သမိုင်းတစ်လျှောက်တွင် တစ်ကြိမ်တစ်ခါမှ မကြုံဖူးသည့် ပမာဏဖြစ်ပြီး နိုင်ငံအတွက် သမိုင်းဝင် အောင်မြင်မှု မှတ်တိုင် တစ်ခု ဖြစ်ပါကြောင်း Andi Amran Sulaiman က ၂၃-၄-၂၀၂၆ ရက် (ကြာသပတေးနေ့)တွင် ဂျာဗားကျွန်းအနောက်ပိုင်း၊ ကာရာဝမ်ရှိ Bulog ဆန်သိုလှောင်ရုံ၌ ဆန်လက်ကျန်များကို စစ်ဆေး ကြည့်ရှုစဉ် ပြောကြားခဲ့ခြင်း ဖြစ်သည်။

    ထိုအောင်မြင်မှုသည် စိုက်ပျိုးရေးဝန်ကြီးဌာနနှင့် နိုင်ငံပိုင်စားနပ်ရိက္ခာ ထောက်ပံ့ပို့ ဆောင်ရေးအဖွဲ့ (Bulog) အပါအဝင် အဖွဲ့အစည်းအသီးသီး၏ စုပေါင်းကြိုးပမ်းမှုများအပြင် ပြည်သူလူထု၊ လေ့လာစောင့်ကြည့်သူများနှင့် သတင်းမီဒီယာများ၏ ပံ့ပိုးကူညီမှုကြောင့်ဖြစ် ကြောင်း၊ အစိုးရအနေဖြင့် ဂိုဒေါင်များကို ငှားရမ်းခြင်းဖြင့် ဆန်သိုလှောင်နိုင်စွမ်း ပမာဏကို ဆက်လက် တိုးမြှင့်ဆောင်ရွက်နေကြောင်း ၎င်းက အတည်ပြု ပြောကြားခဲ့သည်။

    ဥပမာအားဖြင့် ကာရာဝမ် (Karawang) ဒေသတွင် အစိုးရသည် မက်ထရစ်တန် ၁၀၂,၀၀၀ ဆံ့ ဂိုဒေါင်တစ်ခုကို ငှားရမ်းထားပြီး လက်ရှိတွင် တန်ချိန် ၈၀,၀၀၀ ခန့် ဖြည့်တင်းပြီးဖြစ်ကာ လာမည့် နှစ်ပတ်အတွင်း အပြည့်အဝ သိုလှောင်နိုင်မည်ဟု မျှော်လင့်ထားကြသည်။ Bulog ၏ စုစုပေါင်း ဂိုဒေါင်သိုလှောင်နိုင်စွမ်းမှာ တစ်နိုင်ငံလုံး အတိုင်းအတာဖြင့် တန်ချိန် ၃ သန်း ခန့်ရှိပြီး ငှားရမ်းထားသော ဂိုဒေါင်များမှ တန်ချိန် ၂ သန်း ပမာဏ သိုလှောင်နိုင်ရန် ထပ်ဆောင်း ပံ့ပိုး ပေးထားခြင်း ဖြစ်သည်။

   ယခုငှားရမ်းထားသော သိုလှောင်ရုံများသည် လက်ရှိတွင် ၎င်းတို့၏ သိုလှောင်နိုင်စွမ်း ပမာဏသို့ ရောက်ရှိရန် နီးကပ်နေပြီဖြစ်သောကြောင့် နောင်တွင် လက်ကျန်ပမာဏ ထပ်မံ တိုးတက်လာမည့် အခြေအနေကို ကြိုတင်မျှော်တွေး၍ တန်ချိန် ၁ သန်း ဆံ့သော အခြားဂိုဒေါင် နေရာများကို ထပ်မံငှားရမ်းရန် အစိုးရအား တိုက်တွန်းနှိုးဆော်ထားကြောင်း ဝန်ကြီးက မှတ်ချက် ပြု ပြောကြားခဲ့သည်။

    အရန်ဆန်ပမာဏ စံချိန်တင်ရရှိမှုသည် အမျိုးသားစားနပ်ရိက္ခာဖူလုံမှုကို ခိုင်မာစေရုံ သာမက ဆန်ကို များစွာမှီခိုနေရသော ကမ္ဘာ့စားနပ်ရိက္ခာ တည်ငြိမ်ရေးအတွက်လည်း အင်ဒိုနီးရှား နိုင်ငံ၏ ပါဝင်ကူညီမှုကို ပေါ်လွင်စေကြောင်း ၎င်းက ပြောကြားခဲ့သည်။

    အင်ဒိုနီးရှားနိုင်ငံအနေဖြင့် ၂၀၂၃ ခုနှစ်နှင့် ၂၀၂၄ ခုနှစ်အတွင်း ဆန်တန်ချိန် ၇ သန်းခန့် တင်သွင်း ခဲ့ရသော်လည်း ၂၀၂၅ ခုနှစ်တွင်မူ ဆန်တင်သွင်းမှုအားလုံးကို အစိုးရက အောင်မြင်စွာ ရပ်တန့် နိုင်ခဲ့ကြောင်း ၎င်းက ထောက်ပြပြောဆိုခဲ့သည်။

    အစိုးရသည် ပြည်တွင်းဆန်ထုတ်လုပ်မှုနှင့် အရန်ရိက္ခာများတိုးမြှင့်ရန် ဆက်လက်ကြိုးပမ်း နေသဖြင့် ၂၀၂၆ ခုနှစ်တွင်လည်း ဆန်တင်သွင်းရန် လိုအပ်မည်မဟုတ်ဟု မျှော်လင့်ထားသည်။

   အစိုးရက ထုတ်ပြန်ထားသော အရန်ဆန်လက်ကျန် ကိန်းဂဏန်း အချက်အလက်များအား ပွင့်လင်းမြင်သာမှုရှိစေရန် ပြည်သူများအနေဖြင့် Bulog ၏ ဆန်သိုလှောင်ရုံများကို တိုက်ရိုက် ဝင်ရောက် စစ်ဆေးနိုင်ရန် လမ်းဖွင့်ပေးထားပါကြောင်း Sulaiman က ပြောကြားခဲ့သည်။

Source: Antara News, 23 April, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)