ကမ္ဘာလုံးဆိုင်ရာဝယ်လိုအားကြောင့် သစ်သီးနှင့် ဟင်းသီးဟင်းရွက်တင်ပို့မှု မြင့်တက်ခဲ့သည့် ဗီယက်နမ်

         တင်ပို့မှုမြင့်တက်လာခြင်းနှင့် တင်းကျပ်သောနိုင်ငံတကာ စံချိန်စံညွှန်းများကို ပိုမိုလိုက်နာလာခြင်းတို့ကြောင့် ဗီယက်နမ်နိုင်ငံ၏ သစ်သီးနှင့် ဟင်းသီးဟင်းရွက် တင်ပို့မှုများသည် ယခုနှစ် အစပိုင်းကို အားကောင်းစွာ စတင်ခဲ့ပြီး ကမ္ဘာလုံးဆိုင်ရာ ဝယ်လိုအားမြင့်မားမှုကို ထုတ်လုပ်သူ များ အသုံးချနိုင်ခဲ့ကြောင်း Vietnam Fruit and Vegetables Association က ဧပြီလ ၂၃ ရက်နေ့ကပြောကြားခဲ့ပါသည်။ ဧပြီလအတွင်း တင်ပို့မှုမှ ဝင်ငွေ အမေရိကန်ဒေါ်လာ ၅၃၂ သန်းနီးပါး ရရှိခဲ့ပြီး ယခုနှစ် ဇန်နဝါရီလမှ ဧပြီလအတွင်း စုစုပေါင်း တင်ပို့မှုတန်ဖိုးမှာ ဒေါ်လာ ၂.၀၆ ဘီလီယံ ရောက်ရှိခဲ့ကာ ၂၀၂၅ ခုနှစ်တူညီသည့်ကာလနှင့် နှိုင်းယှဉ်ပါက ၂၂ ရာခိုင်နှုန်း မြင့်တက်ခဲ့ကြောင်း အသင်းက ထုတ်ပြန်ခဲ့ပါသည်။ အဓိကကုန်စည်များတွင် ဒူးရင်းသီး၊ ပိန္နဲသီး၊ အုန်းသီး၊ တည်သီး၊ ကျွဲကောသီးနှင့် တောကြက်မောက်တို့ ပါဝင်ကြောင်း သိရပါသည်။ တရုတ်နိုင်ငံသည် စုစုပေါင်းတင်ပို့မှုတန်ဖိုး၏ ထက်ဝက်ကျော်ကိုလက်ခံသည့် အကြီးဆုံးဈေးကွက်အဖြစ် ဆက်လက်တည်ရှိနေပြီး ၎င်း၏နောက်တွင် အမေရိကန်၊ တောင်ကိုရီးယားနှင့် ဂျပန်တို့ရပ်တည်နေကြောင်း သိရပါသည်။ ၂၀၂၆ ခုနှစ် ပထမသုံးလပတ်ကာလအတွင်း သစ်သီးနှင့် ဟင်းသီးဟင်းရွက် တင်သွင်းမှုတန်ဖိုးမှာ အမေရိကန်ဒေါ်လာ ၇၆၁.၄ သန်းခန့်ဖြင့် ယခင်နှစ်တူညီသည့်ကာလနှင့် နှိုင်းယှဉ်ပါက ၂၅.၇ ရာခိုင်နှုန်း မြင့်တက်ခဲ့ကြောင်း သိရပါသည်။ ထိုသို့ တင်သွင်းမှု မြင့်တက်လာခဲ့သော်လည်း ဇန်နဝါရီမှ ဧပြီအထိ ကာလအတွင်း ကဏ္ဍတစ်ခုလုံးသည် အမေရိကန်ဒေါ်လာ ၉၉၈ သန်းနီးပါး ကုန်သွယ်ရေးပိုငွေရရှိခဲ့ကြောင်း သိရပါသည်။ နှစ်အစ အားကောင်းမှုသည် ယခုနှစ်အတွင်း ဒေါ်လာ ၁၀ ဘီလီယံ တင်ပို့မှု ရည်မှန်းချက်ပြည့်မီရန်အခြေခံအုတ်မြစ်တစ်ခုဖြစ်စေကြောင်း အသင်းက ပြောကြားခဲ့ပါသည်။ လိုင်ချီး၊ သရက်သီးနှင့် ဒူးရင်းကဲ့သို့ အဓိက သစ်သီးများ အမြင့်ဆုံး ရိတ်သိမ်းရာသီသို့ ဝင်ရောက်လာသဖြင့် ဒုတိယသုံးလပတ်ကာလသည်လည်း အလားအလာကောင်းမွန်နေကြောင်းလည်း သိရပါသည်။ အေးခဲထားသောသစ်သီးများနှင့် လတ်ဆတ်သော အုန်းသီးများအတွက် တင်ပို့မှု ပရိုတိုကောအသစ်များကို ထုတ်ပြန်ထားခြင်းကလည်း တိုးတက်မှုကို ဆက်လက်အထောက်အကူပြုမည်ဟု မျှော်မှန်းရကြောင်း သိရပါသည်။ အသင်း၏ အထွေထွေအတွင်းရေးမှူး Dang Phuc Nguyen က စီးပွားရေးလုပ်ငန်းများအနေဖြင့် ထုတ်လုပ်မှုများကို ခေတ်မီစေခြင်း၊ စိုက်ပျိုးရေးနည်းပညာနှင့် ရိတ်သိမ်းပြီးနောက် လုပ်ငန်းစဉ်များကို အဆင့်မြှင့်တင်ခြင်းနှင့် တင်သွင်းသည့်နိုင်ငံများ၏ စံနှုန်းသတ်မှတ်ချက်များကို တင်းကျပ်စွာ လိုက်နာခြင်းတို့ လိုအပ်ကြောင်း ပြောကြားခဲ့ပါသည်။ ထို့အပြင် စိုက်ပျိုးဧရိယာများကို ဒစ်ဂျစ်တယ်စနစ်ဖြင့် စီမံခန့်ခွဲခြင်း၊ သိမ်းဆည်းမှုနှင့် သယ်ယူပို့ဆောင်ရေး တိုးတက်ကောင်းမွန် ရေးတို့အပါအဝင် အဆင့်မြင့်နည်းပညာအသုံးပြုမှုများ ပိုမိုလိုအပ်မည်ဟုလည်း ၎င်းက ထပ်လောင်း ပြောကြားခဲ့ပါသည်။ ဗီယက်နမ်စိုက်ပျိုးမွေးမြူရေးနှင့် သဘာဝပတ်ဝန်းကျင် ဝန်ကြီးဌာနကလည်း စိုက်ပျိုးဧရိယာများ စံချိန်စံညွှန်းတူညီစေရန်နှင့် ထုပ်ပိုးစက်ရုံများကို စစ်ဆေးကြပ်မတ်မှုတင်းကျပ်ရန် ပူးပေါင်းဆောင်ရွက်မှု တိုးမြှင့်မည်ဖြစ်ကြောင်း ပြောကြားခဲ့ပါသည်။ ၎င်းသည် တရုတ်ဈေးကွက်သို့ တင်ပို့မှုတည်ငြိမ်စေရန်နှင့် အခြားဈေးကွက်များသို့ ချဲ့ထွင်ရန် ရည်ရွယ်ကြောင်း သိရပါသည်။ ၂၀၂၅ ခုနှစ်တွင် ဗီယက်နမ်၏ သစ်သီးနှင့် ဟင်းသီးဟင်းရွက် တင်ပို့မှု စုစုပေါင်းတန်ဖိုးမှာ ဒေါ်လာ ၈.၅ ဘီလီယံ ရောက်ရှိခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)