လီလီပန်းသည် လှပခြင်း၊ အရောင်အသွေးစုံလင်ခြင်း၊ ရနံ့မွှေးကြိုင်ခြင်း၊ တန်ဖိုးထားသုံး စွဲခံရခြင်းစသော ဂုဏ်ကျက်သရေများနှင့်ပြည့်စုံပြီး နှစ်ပေါင်းများစွာတိုင် ယဉ်ကျေးမှု၊ အနုပညာနှင့် ဘာသာရေးတွင် နက်ရှိုင်းစွာအမြစ်တွယ်ခဲ့သောကြောင့် “ပန်းမာန်လောက၏ဘုရင်မ” တစ်ပါးအဖြစ် တင်စားခေါ်ဝေါ်ခြင်းခံခဲ့ရပါတယ်။ ရှေးခေတ်သမိုင်းများအရ လီလီပန်း၏သက်တမ်းသည် နှစ်ထောင် ပေါင်းများစွာကြာရှည်ခဲ့ပြီး ၁၅၈၀ ဝန်းကျင်လောက်မှာ လီလီပန်းကို ခရီတီးကျွန်းရှိ နန်းတော် တစ်ခုတွင် တွေ့ရှိခဲ့တယ်လို့သိရပြီး ဂရိလူမျိုး၊ ရောမလူမျိုးနှင့်အီဂျစ်လူမျိုးများကတော့ ဘီစီ ၂၀၀၀ ပြည့်နှစ်လောက်မှာ စတင်တွေ့ရှိခဲ့ကြပါတယ်။ လီလီပန်း သမိုင်းတစ်လျှောက်သည် မြင့်မြတ်ခြင်း၊ ဂုဏ်ကျက်သရေနှင့်ယဉ်ကျေးမှုအထိမ်းအမှတ်များစွာရှိခဲ့ပြီး လီလီ ပန်း၏ကြီးမားသောပွင့်ချပ်များ၊ ထူးခြားသောရနံ့နှင့်ကြာရှည်ခံမှုများကြောင့် ယခု ၂၀၂၅ ခုနှစ်၌ Premium Flower Cut တွင်လည်းဝယ်လိုအားမြင့်တက်နေပြီး တန်ဖိုးမြှင့်ထုတ်ကုန်အဖြစ်ရပ်တည်နေပါတယ်။ လီလီပန်း စိုက်ပျိုးထုတ်လုပ်သူများသည် လီလီပန်း၏သမိုင်းဝင်အမှတ်တံဆိပ်ကိုအသုံးချကာ စီးပွားရေး ဈေးကွက်ကို မြှင့်တင်ပြီး ကမ္ဘာ့ဈေးကွက်တွင် နေရာခိုင်မာလာအောင် လုပ်ဆောင်ခဲ့ကြပါတယ်။
လီလီပန်းပေါက်ရောက်ရာဒေသများ
လီလီပန်း၏မူလပေါက်ရောက်ရာဒေသများသည် တရုတ်၊ ထိုင်ဝမ်နှင့် ဂျပန်ပြည်တောင်ပိုင်း၊ ဥရောပ တောင်ပိုင်းနှင့် မြောက်ဘက်သမပိုင်းဒေသများဖြစ်ကြပြီး ယနေ့ခေတ်တွင် ကမ္ဘာတစ်ဝန်း၌ ကျယ်ပြန့်စွာ စိုက်ပျိုးလျက်ရှိနေပါတယ်။ လီလီပန်းမူလမျိုးစိတ်ကို သမပိုင်းဒေသ၏ တောင်တန်း များ၊ သစ်တောများနှင့် မြက်ခင်းပြင်လိုနေရာများတွင်တွေ့ရှိနိုင်ပြီး ဒေသရင်းလီလီပန်းနှင့် တောရိုင်း လီလီပန်းမျိုး ကွဲများစွာကို မြန်မာ့ တောရိုင်းဒေသများတွင်တွေ့ရသောကြောင့် မြန်မာနိုင်ငံသည် လီလီပန်းမူလပေါက်ရောက်ရာဒေသများထဲက တစ်ခုဖြစ်ကြောင်းလည်း ဖော်ပြနေပါတယ်။ မြန်မာနိုင်ငံမှာဆိုရင် လီလီပန်းကို ကချင်ပြည်နယ်၊ ချင်းပြည်နယ်၊ ရှမ်းပြည်နယ်နှင့် ပြင်ဦးလွင်မြို့ တို့တွင် စိုက်ပျိုးပြီး အထူးသဖြင့် ရှမ်းပြည်နယ်နှင့် ပြင်ဦးလွင်ဒေသမှ လီလီပန်း များစွာထွက်ရှိပြီး ယင်းဒေသများသည် ရာသီဥတုအေးမြပြီး မြေဆီဩဇာထက်သန်သောကြောင့် အရည်အသွေး ကောင်းမွန်သော လီလီပန်းမျိုးစိတ်များစွာ ပေါက်ရောက်ပါတယ်။
လီလီပန်းသည် အမြစ်ဥကနေပေါက်ရောက်သော နှစ်ရှည်ခံပန်းမျိုးဖြစ်ပြီး အခြားပန်းများနှင့် မတူဘဲ တစ်မူထူးခြားစေတဲ့အချက်က ပွင့်ချပ်များသည် ခေါင်းလောင်းပုံ၊ ခရာပုံ၊ တူရကီဦးထုပ်လိုမျိုး အပြင်ဘက်သို့ ကွေးညွတ်နေသော ပုံစံမျိုးနဲ့ပွင့်လေ့ရှိသောကြောင့်ဖြစ်တယ်။ လီလီပန်းပွင့် တစ်ခုစီတွင် ပွင့်ချပ် ၆ ချပ် ပါဝင်ပြီး အတွင်း ၃ ချပ်နှင့်အပြင် ၃ ချပ်တို့သည် တစ်ခုတည်းအဖြစ် ပေါင်းစပ်နေတာမျိုးမရှိဘဲ သီးခြားစီဖြစ်နေပါတယ်။ ပွင့်ချပ်များပေါ်တွင် အစက်အပြောက်များ ပါရှိခြင်းလည်း လီလီပန်းမျိုးစိတ်၏ ထင်ရှားသောလက္ခဏာတစ်ခု ဖြစ်ပါတယ်။ အချို့သော လီလီမျိုးစိတ်များသည် မြေကြီးထဲရှိပန်းဥအပြင် ပင်စည်၏အပေါ်ပိုင်းမြေပြင်အနီး၌ အမြစ်များကို ထပ်မံဖြာထွက်စေနိုင်ခြင်းသည် ၎င်း၏ရေနှင့်အာဟာရစုပ်ယူမှုစွမ်းရည်ကို တိုးတက်စေနိုင်သည့် ထူခြားချက်ဖြစ်ပါတယ်။
လီလီပန်းအမျိုးအစား၊ ရနံ့နှင့်အရောင်အသွေး
လီလီပန်းမျိုးစိတ်တစ်ခုချင်းစီတွင် ထူးခြားသောအသွင်အပြင်များစွာရှိပြီး ပန်းမျိုးစိတ်ပေါင်း ၂၀၀၀ ကျော်ရှိကာ သိပ္ပံအမည်မှာ Lilium ဖြစ်ပါတယ်။ လူသိများလှပြီး ဈေးကွက်ထဲ တွင်တွေ့ရလေ့ရှိတဲ့ လီလီပန်း များကတော့ Asiatic Lilies၊ Oriental Lilies နှင့်Trumpet Lilies တို့ဖြစ်ပါတယ်။ Asiatic Lilies သည် ရနံ့ လုံးဝမရှိသလောက်ဖြစ်ပြီး အရောင်အသွေး အစုံလင်ဆုံးဖြစ်ကာ အဖြူရောင်၊ အဝါရောင်၊ လိမ္မော်ရောင်၊ ပန်းရောင်၊ အနီရောင်နှင့် ကြက်သွေးရောင်များရှိပြီး ပွင့်ချပ်များပေါ်တွင် အစက်အပြောက်များပါရှိပါတယ်။ Oriental Lilies နှင့်Trumpet Lilies သည် ရနံ့အလွန်ပြင်းထန်ပြီးမွှေးကြိုင်ကာ အခန်းတစ်ခုလုံးကို ရနံ့ဖြင့် ဖုံးလွှမ်းနိုင်သည့်အတွက် လူကြိုက်အများဆုံးဖြတ်ပန်းများထဲတွင်ပါဝင်ကာ အရောင်များကတော့ အဖြူရောင်၊ အဝါနုရောင်နှင့်ပန်းရောင်အရင့်အနုတို့ရှိပြီး Oriental Lilies ရဲ့ထူးခြားချက်ကတော့ ပန်းပွင့်အရွယ်အစား အလွန်ကြီးမားပြီး နွေရာသီကာလ၌ ပွင့်လေ့ရှိပါတယ်။ Trumpet Lilies သည် ပန်းပွင့်များကြီးမားပြီး ခရာပုံစံရှိကာ အရောင်များကတော့ အဖြူရောင်၊ အဝါရောင်၊ လိမ္မော်ရောင်နှင့် ပန်းရောင်များရှိပြီး အတွင်းရောင်နှင့် အပြင်ရောင်ကတော့ကွဲပြားပါတယ်။
နိုင်ငံ၊ လူမျိုး၊ ဘာသာအလိုက် ယဉ်ကျေးမှုအရအနက်အဓိပ္ပါယ်ဖွင့်ဆိုမှု
ယနေ့ခေတ်တွင် လီလီပန်းကို ကမ္ဘာတစ်ဝန်းမှာကျင်းပကြတဲ့ ပျော်ပွဲရွှင်ပွဲများ၊ အခမ်း အနားများ၊ ဘာသာရေးပွဲများ၊ မင်္ဂလာပွဲများ၊ ပန်းပွဲတော်များနှင့် ဈာပနအခမ်းအနားများတွင် သုံးစွဲလျက်ရှိနေပါတယ်။ မြန်မာနိုင်ငံတွင် ၁၂ လရာသီပန်းများစွာပွင့်လန်းလျက်ရှိပြီး ထိုပန်းများတွင် လီလီပန်းမပါဝင်သော်လည်း မြန်မာလူမျိုးတို့ကလီလီပန်းကို အရေးကြီးအခမ်းအနားနှင့် ပွဲတော်များ တွင်အသုံးပြုကြပြီး မြန်မာ့ရိုးရာပွဲတော် ဖြစ်သော သင်္ကြန်ကာလတွင် ဘုရားစေတီပုထိုးများ၊ ဘုန်းကြီးကျောင်းများနှင့် နေအိမ်ရှိဘုရားကျောင်းဆောင် များတွင် ဘုရားပန်းအဖြစ်ကပ်လှူကြသည့် အပြင် ဟိုတယ်ကြီးများ၊ မင်္ဂလာပွဲများ၊ ရုံးခန်းများ၊ ဘွဲ့နှင်းသဘင် အခမ်းအနားများနှင့် နေအိမ်များတွင်လည်း အလှဆင်သုံးစွဲလျက်ရှိနေပါတယ်။ လီလီပန်း၏လှပမှုနှင့် ကြာရှည်ခံမှုများကြောင့် အခြားပန်းများနည်းတူ ရောင်းအားကောင်းလျက်ရှိနေကာ မြန်မာနိုင်ငံတွင် လည်း လီလီပန်းဝယ်ယူသုံးစွဲသူများပြားလျက်ရှိနေပြီး ခေတ်ပေါ်အလှဆင်ပန်းအဖြစ် အသုံးပြုမှုတွင် ကျယ်လျက်ရှိ နေပြီဖြစ်ပါတယ်။
လီလီပန်းများစွာအနက် အဖြူရောင်လီလီပန်း ( Madonna Lily )သည် လူကြိုက်များပြီး နိုင်ငံအလိုက် လူမျိုးအလိုက် အသုံးပြုမှုအများဆုံးလည်းဖြစ်ပါတယ်။ လီလီပန်းအဖြူရောင်ကို ဂရိခေတ်၊ ရောမခေတ်နှင့် ခရစ်ယာန်ဘာသာရေးပွဲတော်များတွင် မွန်မြတ်ခြင်းနှင့် မြင့်မြတ်ခြင်း၏ သင်္ကေတအဖြစ် အသုံးပြုကြပြီး အီစတာလီလီပန်း (Easter Lily )ကိုလည်း ခရစ်ယာန်ဘာသာတွင် သခင်ယေရှုရှင်ပြန်ထမြောက်ခြင်းနှင့် ထာဝရရှင်သန်ခြင်းအတွက်သုံးစွဲကြပါတယ်။ တရုတ်ရိုးရာ ယဉ်ကျေးမှုတွင် လီလီပန်းကို ချမ်းသာကြွယ်ဝမှု၊ စည်းစိမ်ဥစ္စာနှင့် ရာထူးတိုးခြင်းရဲ့ သင်္ကေတအဖြစ် ယူဆကြပြီး နွေဦးပွဲတော် (Chinese Year) ကာလ၌ နေအိမ် များတွင် အလှဆင်ခြင်း၊ တရုတ်ဘုံ ကျောင်းများ၌ ကံကောင်းခြင်းသင်္ကေတအဖြစ် လီလီပန်းများကို ဝတ်ပြု ကန်တော့ရာ၌ အသုံးပြုကြပါတယ်။
ဂျပန်လူမျိုးတွေကတော့ လီလီပန်းကို လှပခြင်းနှင့်အေးချမ်းခြင်းဟုအဓိပ္ပါယ်သတ်မှတ်ကြပြီး ဂျပန်ပန်းချီကားများနှင့် အနုပညာလက်ရာများတွင် လီလီပန်းပုံများကို ရေးဆွဲထည့်သွင်း လေ့ရှိကြတယ်။ ပြင်သစ် နိုင်ငံမှာဆိုရင် လီလီပန်းပုံကို ပြင်သစ်ဘုရင်မင်းမြတ်၏တံဆိပ်တော်တွင် အမှတ်အသားအဖြစ်ထွင်းထုထားပြီး တော်ဝင်မိသားစုတွေရဲ့အမှတ်အသားအဖြစ် အသုံးပြုခဲ့ကြကာ ဂုဏ်ကျက်သရေနှင့်အင်အားတိုးပွားစေတယ် လို့မှတ်ယူကြပါတယ်။ လီလီပန်းသည် နေရာဒေသ အလိုက် အလှအပ၊ ကြွယ်ဝမှုနှင့် တန်ဖိုးထားမှုတို့ကို ညွှန်းဆိုပြသသော်လည်း ဝမ်းနည်းခြင်းနှင့် လွမ်းဆွတ်တမ်းတခြင်းအဓိပ္ပါယ်ကိုလည်း ကိုယ်စားပြုဖော်ပြလေ့ ရှိပါတယ်။
လီလီပန်းအလှဆင်ခြင်းနှင့်လက်မှုပညာပေါင်းစပ်ဖန်တီးမှု
လီလီပန်းကို ပန်းစည်းများပြုလုပ်ရာတွင်လည်းကောင်း၊ အလှဆင်ပန်းအိုးများတွင် တာရှည်ခံစေရန် အတွက် ပန်းများကိုကြိုးဖြင့်ချည်နှောင်ပြီး လေဝင်လေထွက် ကောင်းသော နေရာတွင် ဇောက်ထိုးချိတ်ဆွဲ၍ ခြောက်သွေ့စေခြင်းနည်းလမ်းကိုအသုံးပြုကြပါတယ်။ မြန်မာနိုင်ငံရှိ လက်မှုပညာရှင်များ (Crafters)က လီလီ ပန်းပွင့်ဖတ်များကို ပန်းခြောက်များဖြစ်စေရန်အတွက် ပန်းဖိစက်ဖြင့်ဖိ၍ခြောက်သွေ့စေပြီး ပန်းချပ်ပြားများ ရရှိလာသောအခါ လက်ရာဒီဇိုင်းဆန်းသစ် လှပစေရန်အတွက် လက်မှုပစ္စည်းများတွင် ထည့်သွင်းအသုံးပြုလေ့ ရှိကြတယ်။ ပန်းခြောက်များ အမြန်ဆုံးရရှိနိုင်စေရန် Silica Gel ကိုအသုံးပြုပြီး လီလီပန်းပွင့်ဖတ်များကို ဖုံးအုပ်ကာ အမြန်ဆုံးခြောက်သွေ့စေနိုင်ပါတယ်။ ဘောင်ခတ်ထားသောပန်းချီလက်ရာများတွင် ပန်းခြောက် အလှဆင် ပန်းချီအဖြစ်ဖန်တီးပြုလုပ်သောအခါ လီလီပန်းခြောက်များကို ထည့်သွင်း အသုံးပြု လေ့ရှိပြီး မင်္ဂလာဆောင်ဖိတ်စာများတွင်လည်း လီလီပန်းခြောက်များကိုကပ်၍ အလှဆင်လေ့ ရှိကြပါတယ်။
ပြည်တွင်းလီလီပန်းစိုက်ပျိုးမှု
ပြည်တွင်း၌လီလီပန်းစိုက်ပျိုးမှုသည် တန်ဖိုးမြှင့်ထုတ်ကုန်တစ်ခုအဖြစ်နေရာယူထားပြီး အရည်အသွေး ကောင်းမွန်သောအထွက်နှုန်းရရှိစေရန် ဖန်လုံအိမ် သို့မဟုတ် အမိုးအကာအောက် စိုက်ပျိုးခြင်းများလိုအပ်နေပါတယ်။ အများဆုံးစိုက်ပျိုးတာကတော့ အဖြူရောင်လီလီပန်းဖြစ်ပြီး မြန်မာနိုင်ငံမှ လီလီပန်းစိုက်ပျိုးသူများ သည် ပြည်ပနိုင်ငံများဖြစ်သော တရုတ်နှင့်နယ်သာလန်နိုင်ငံ တို့မှ လီလီပန်းဥများမှာယူတင်သွင်းပြီး ပြန်လည် စိုက်ပျိုးရတာဖြစ်တဲ့အတွက် ပြည်ပမှပန်းဥများကို ဝယ်ယူရသောကြောင့် ကုန်ကျစရိတ်မြင့်မားစေပြီး ပြည်တွင်းစိုက်ပျိုးသူတွေအတွက် ပြည်ပနိုင်ငံများ အပေါ်မှီခိုနေရတဲ့အနေအထားတစ်ခုပါ။ လီလီပန်းဥများသည် အအေးဓာတ်လိုအပ်သဖြင့် စိုက်ပျိုး ချိန်မတိုင်မီ အအေးခန်းတွင်သိုလှောင်ထားရလေ့ရှိပြီး နည်းပညာပိုင်းအရ နိုင်ငံတကာစံနှုန်းမီ စိုက်ပျိုးထုတ်လုပ်မှု၊ ရိတ်သိမ်းပြီးနောက်ထိန်းသိမ်းမှုနှင့် သယ်ယူပို့ဆောင်ရေး တို့တွင် လိုအပ်ချက် များရှိနေသေးကြောင်းလည်းသိရပါတယ်။ ပြည်တွင်း၌ လီလီပန်းကို ရာသီဥတုအေးမြပြီး တောင်ပေါ်ဒေသများဖြစ်သော (ရှမ်းပြည်နယ်နှင့်ပြင်ဦးလွင်)တို့မှာ အဓိကစိုက်ပျိုး နိုင်ပြီး ပြည်တွင်း ဈေးကွက် အနေနဲ့ ရန်ကုန်နှင့်မန္တလေးဈေးကွက်ကိုသာ အဓိကမှီခိုနေရပါတယ်။
ဈေးကွက်ယှဉ်ပြိုင်မှုနှင့်အရည်အသွေးထိန်းသိမ်းမှု
လက်ရှိအနေအထားအရ ပြည်တွင်း၌စိုက်ပျိုးသောလီလီပန်းများကို ပြည်ပနိုင်ငံများသို့ တင်ပို့မှု အားနည်းနေသေးသော်လည်း ဓာတုဆေးဝါးမသုံးဘဲ Organic နည်းစနစ်ဖြင့် စိုက်ပျိုးမှုကြောင့် ပြည်ပ ဈေးကွက်တွင် ဈေးနှုန်းအရ ၂၀ ရာခိုင်နှုန်းပိုမိုရရှိနေပြီး ရေရှည်မှာတော့ တင်ပို့မှုအလားအလာကောင်းနိုင် တယ်လို့မျှော်လင့်ရပါတယ်။ လီလီပန်းစိုက်ပျိုးသူများအနေဖြင့် သွင်းအားစုမြင့်တက်မှုကြောင့် ပန်းဈေးနှုန်း မြင့်တက်ပြီးရောင်းချသော်လည်း ရရှိလာသော အမြတ်အစွန်းသည် လျော့နည်းလျက်ရှိနေပြီး မိုးရာသီကာလ လီလီပန်းစိုက်ပျိုးမှု နည်းပါးသော အချိန်တွင် တရုတ်နိုင်ငံမှ ဈေးသက်သာသောလီလီပန်းများ ပြည်တွင်းသို့ ဝင်ရောက်လာသဖြင့် ပြည်တွင်းစိုက်ပျိုးသူများအတွက် စိန်ခေါ်မှုတစ်ရပ်ဖြစ်စေပါတယ်။ နိုင်ငံတကာစံချိန်မီ အရည်အသွေး ရရှိစေရေး၊ အအေးပေးသယ်ယူပို့ဆောင်မှုစနစ်တည်ထောင်နိုင်ရေးနှင့် အရည်အသွေးထိန်းသိမ်း မှုတို့ကို စနစ်တကျကျင့်သုံးပါက ပြည်တွင်းလီလီပန်းများသည် လတ်ဆတ်ပြီးကြာရှည်ခံကာ ပြည်ပ နိုင်ငံများ နှင့်ဈေးကွက်ယှဉ်ပြိုင်နိုင်စွမ်းရှိလာမည်ဖြစ်ပါတယ်။
၂၀၂၅ ခုနှစ်အတွင်းလီလီပန်းဈေးကွက်
လီလီပန်းသည် ကမ္ဘာ့ပန်းဈေးကွက်တွင် နှင်းဆီပန်းဈေးကွက်ပြီးနောက် ဒုတိယနေရာလိုက်နေပြီး ရောင်းအားကောင်းသောနေရာတွင် ရည်တည်နေကာ အရှေ့တိုင်းမျိုးစပ် (Oriental Lily)များသည် အရွယ်အစားကြီးမားပြီး ရနံ့မွှေးပျံ့ခြင်းကြောင့် ဈေးနှုန်းအမြင့်ဆုံး ရောင်းချနေရ၍ ဈေးကောင်းရလျက်ရှိနေပါတယ်။ ယခု၂၀၂၅ ခုနှစ်တွင် လီလီပန်းသည် စုစုပေါင်းဖြတ်ပန်းဈေးကွက်၏ကြီးထွားနှုန်းထက်ပင် ပိုမိုမြင့်မားသော ၆.၄ ရာခိုင်နှုန်းကြီးထွားနှုန်း ဖြင့် တိုးတက်လာမည်ဟုခန့်မှန်းရပြီး နှစ်ထပ်ပွင့်လီလီများသည် ဝယ်လိုအားသိသိသာသာ မြင့်တက်လာပြီး ၂၀၂၅ ခုနှစ်အတွက် ထုတ်လုပ်မှုပိုမိုတိုးတက်လာနိုင်ပြီး သမားရိုးကျ လီလီများထက် ဈေးပိုရရှိနိုင်လိမ့်မယ်လို့သိရပါတယ်။
လီလီပန်းအဖြူရောင်နှင့်ပန်းရောင်တို့သည် ကမ္ဘာတစ်ဝန်းတွင် ယနေ့ကာလအထိ ဝယ်လိုအား အမြင့်ဆုံးဖြစ်နေပြီး ရေရှည်တည်တံ့သောစိုက်ပျိုးမှုရှိတဲ့ ဥရောပဒေသများမှ လီလီပန်း များကို ပိုမိုရွေးချယ် ဝယ်ယူလာကြပါတယ်။ နယ်သာလန်နိုင်ငံသည် လီလီပန်းဥနှင့် ဖြတ်ပန်းတင်ပို့မှု၏ ၅၀ ရာခိုင်နှုန်းကို လွှမ်းမိုး ထားဆဲဖြစ်ပြီး ဥရောပဒေသသည် ဈေးကွက်၏ အကြီးမားဆုံး ဒေသအဖြစ်ဆက်လက်တည်ရှိနေဆဲပါ။ တရုတ်၊ ဂျပန်၊ ထိုင်းနှင့်အခြားအာရှ နိုင်ငံများသည်လည်း လီလီပန်းစိုက်ပျိုးထုတ်လုပ်ရာတွင် အရေးပါသောနိုင်ငံများ ဖြစ်ပြီး ဒေသတွင်း ဝယ်လိုအားကိုမြှင့်တင်ပေးပြီး လီလီပန်းဝယ်ယူသုံးစွဲမှုနှင့် အလှဆင်မှုများမြင့်တက်လာ ခြင်းကြောင့် လည်းအနာဂတ်တွင် အလျင်မြန်ဆုံးကြီးထွားလာနိုင်တဲ့ ဈေးကွက်ဖြစ်လာနိုင်ကြောင်း ခန့်မှန်း ထားတယ်လို့သိရပါတယ်။
ပြည်တွင်းနှင့်ပြည်ပဈေးကွက်တက်လှမ်းနိုင်မည့်အခွင့်အလမ်း
နိဂုံးချုပ်အားဖြင့်ဆိုရသော် လီလီပန်းသည် ရှေးနှစ်ပေါင်းများစွာထဲက သန့်စင်ခြင်းနှင့် ဂုဏ် ကျက်သရေဆိုင်ရာယဉ်ကျေးမှုကို ယနေ့အထိဆက်လက်ထိန်းသိမ်းထား လျက်ရှိနေပြီး စီးပွားရေးဈေးကွက်အရ လည်း ၂၀၂၅ ခုနှစ်၊ ပန်းမာန်ဈေးကွက်တွင် Commercial Value သိသိသာသာမြင့်တက်လာတာကို တွေ့ရပါ တယ်။ Digital စနစ်၏လွှမ်းမိုးမှုအရ လီလီပန်းများကို အွန်လိုင်းမှတစ်ဆင့် ဝယ်ယူမှုမြင့်တက်လာပြီး ပြည်တွင်း၌ လီလီပန်းသုံးစွဲဝယ်ယူမှု များပြားလာသောကြောင့် မြန်မာနိုင်ငံရှိလီလီပန်းစိုက်ပျိုးသူများအတွက် ပြည်တွင်းဝင်ငွေများစွာ ရရှိနေပါတယ်။ လက်ရှိ ၂၀၂၅ ခုနှစ်တွင် လီလီပန်းစိုက်ပျိုးမှုအတွက် စီးပွားရေးအရ ရင်းနှီးမြှုပ်နှံ သူများပြားလျက်ရှိနေသောကြောင့် အနာဂတ်တွင် လီလီပန်းစိုက်ပျိုးမှုပိုမိုချဲ့ထွင်နိုင်လာနိုင်ပြီး နိုင်ငံ၏စီးပွားရေးဈေးကွက်အလားအလာကောင်းစေနိုင်တယ်လို့ မျှော်လင့်မိပါတယ်။
ပြည်တွင်း၌လီလီပန်းစိုက်ပျိုးထုတ်လုပ်သူများသည်လီလီပန်းတန်ဖိုးမြင့်တက်မှုကို ဆက်လက် ထိန်းသိမ်းရန်အတွက် ကမ္ဘာ့ဈေးကွက်လမ်းကြောင်းအရ လိုအပ်နေသော ပိုမိုကောင်းမွန် သည့်မျိုးကွဲများ၊ အရည်အသွေးမြင့်ထုတ်ကုန်များနှင့် ရေရှည်တည်တံ့သော စိုက်ပျိုးရေးနည်း စနစ်များကို လက်ခံကျင့်သုံးရန် လိုအပ်ပါတယ်။ အဆိုပါစိန်ခေါ်မှုများကို ကျော်လွှားနိုင်မှသာ လီလီပန်းသည် ဖြတ်ပန်းဈေးကွက်တွင် ရောင်းအားပိုမိုကောင်းမွန်လာပြီး အရေးပါသောနေရာ ရလာမည်ဖြစ်ပါတယ်။ လက်ရှိအနေအထားအရ မြန်မာ့လီလီပန်းဈေးကွက်သည် တရုတ်နိုင်ငံမှ တင်သွင်းလာသော ဖြတ်ပန်းများနှင့်ဒေသမျိုးမဟုတ်သည့် လီလီမျိုးကွဲ များကို မှီခိုနေရဆဲဖြစ်ပြီး လီလီပန်းစိုက်ပျိုးထုတ်လုပ်မှုဖွံ့ဖြိုးတိုးတက်စေရန်နှင့်ပြည်ပနိုင်ငံများနှင့်ရင်ဘောင် တန်းနိုင်စေရန် ပြည်တွင်း၌ပန်းဥထုတ်လုပ်မှုနည်းပညာကိုဖော်ဆောင်ပြီး အရည်အသွေးနှင့်စံချိန်စံညွှန်းများ ပြည့်မီအောင်အားထုတ်ရင်း ကမ္ဘာ့ဈေးကွက်သို့ တက်လှမ်းနိုင်မည့် ရေရှည်စီမံကိန်းများ ချမှတ်ဆောင်ရွက်သင့်ကြောင်း ရေးသားလိုက်ရပါတယ်။