ကြောင်လျှာပင်သည် အပင်လတ်အမျိုးအစားဖြစ်ပြီး ကြီးထွားနှုန်းမြန်သောအပင်တစ်မျိုးဖြစ်၍ အပင်အမြင့်အနေဖြင့်(၈)မီတာမှ (၁၅)မီတာ အထိမြင့်တက်မှုရှိပါသည်။ အခေါက်ထူ၍ မီးခိုး စိမ်းရောင်ရှိပြီး အတွင်းသားအနေဖြင့် အဝါရောင်ရှိ၍ အရွက်ပုံစံမှာ ရွက်ရင်းအနည်းငယ် ဝိုင်းကာ အရွက်အဖျားပိုင်းသည် အချွန်ပုံစံရှိပါသည်။ အပွင့် ပွင့်ချိန်အနေဖြင့် နယုန်လနှင့် ဝါဆိုလများတွင် ခေါင်းလောင်းပုံစံရှိသော ခရမ်းရောင်အပွင့်များ ပွင့်ပြီး အသီးမှာ တွဲလျားကျ၍ သီးသော သီးတောင့် ရှည် အပြားသီးအမျိုးအစားဖြစ်ပါသည်။ အရှည်အနေဖြင့် လက်တစ်တောင် ကျော်ခန့်ရှည်၍ အမွှေးနု ကလေးများပါရှိပါသည်။ အသီးအတွင်းသားမှာထူ၍ အပွင့်၊ အသီးနှင့် အရွက်အားလုံးကို အစားအဖြစ် စားသုံးနိုင်သလို ဆေးဖက်လည်းဝင်၍ ကျန်းမာရေးကို အထောက်အကူပြုပါသည်။ ကြောင်လျှာသီး၏ အရသာမှာ ခါးပြီးဖန်ချိုအရသာရှိ၍ ကျန်းမာရေး နှင့်ညီညွတ်သော အသီးတစ်မျိုးဖြစ်ပါသည်။ အပွင့်နှင့်ရွက်နုကို ရေနွေးဖြင့် ဖျောပြီးသုပ်စား လေ့ရှိသလို ငါးပိရည်ဖြင့်လည်း အတို့အမြုပ်လုပ်စား ကြပါသည်။ အပွင့်နှင့်အရွက်နုစားခြင်းဖြင့် လေအားကောင်းစေခြင်း၊ နားလေထွက်ခြင်း၊ နားပင်း ခြင်း၊ နားအူခြင်း၊ နားလေးခြင်းများကို သက်သာစေနိုင်ပါသည်။ ကြောင်လျှာသီးကို မီးဖုတ်၍ ဖြစ်စေ၊ ပြုတ်၍ဖြစ်စေ၊ ကြော်စား၍ ဖြစ်စေ၊ အသားတစ်မျိုးမျိုးဖြင့်လည်း ရောချက်၍စားသုံးကြလေ့ရှိပါသည်။ ကြောင်လျှာသီး စားသုံးပေးခြင်းဖြင့် ဝမ်းမီးကို ကောင်းစေပြီး အစာကြေလွယ်ကာ စားချင် သောက်ချင်စိတ် ကိုဖြစ်ပေါ်စေနိုင်ပါသည်။ ထို့အပြင် ချောင်းဆိုးခြင်း၊ လေသလိပ်ထခြင်း၊ အအေးမိခြင်း၊ ပန်းနာရင်ကြပ်ကိုသက်သာစေခြင်း၊ နှလုံးတုန်ရင်တုန်ခြင်းကို သက်သာစေခြင်း၊ ဖောရောင် ခြင်းကိုသက်သာစေခြင်း၊ အစာမကြေဝမ်းပျက်ခြင်း၊ ဒူလာသွေးဝမ်း၊ မီးယပ်သွေးဝမ်း၊ လိပ်ခေါင်းရောဂါများကို သက်သာစေနိုင်သည့်အပြင် ဆံပင်ကိုလည်း နက်မှောင်သန်စွမ်းစေနိုင်သော ဆေးဖက်ဝင်အပင်တစ်မျိုးဖြစ်ကြောင်း သိရှိရပါသည်။
DOCA(မန္တလေး)