ရုံးပတီသီးမျိုးများတွင် အစိမ်းနှင့်အနီမျိုးဟူ၍(၂)မျိုးရှိပြီး အနံ့အရသာအာဟာရ ကွဲပြားမှုမရှိဘဲ အရောင်အားဖြင့်သာ ကွဲပြားမှုရှိကြောင်းသိရသည်။ ဟင်းချက်သည့်အခါ အနီရောင်သည် အစိမ်းရောင်အဖြစ်သို့ ပြောင်းသွားသည်။ ပူနွေးသောရာသီဥတုကိုကြိုက်နှစ်သက်ပြီး ဆောင်းရာသီတွင် အပင်ဖြစ်ထွန်းမှုမကောင်းပါ။ မြေမရွေးစိုက်ပျိုးနိုင်သော်လည်း ရေစိမ့်ဆင်းမှုကောင်းသောမြေမျိုး ဖြစ်ရမည်။နွေရာသီတွင်စိုက်ပျိုးပါက ရုံးပတီမျိုးစေ့အား(၄)နာရီခန့် ရေစိမ်ပေးရပါမည်။ ထို့နောက်မျိုးစေ့ကို ရေသန့်ဖြင့် ဆေး၍တစ်ကျင်းလျှင် (၃)စေ့ခန့်ချ၍ တိုက်ရိုက်စိုက်ပျိုးပါ။ မိုးရာသီတွင် ရေစိမ်ရန်မလိုအပ်ပါ။ အစေ့မှအပင်ပေါက်ရန်အတွက် စိုက်ဘောင်၏ အပူဓာတ်သည် အရေးကြီးပါသည်။ တန်းကြား(၃)ပေ၊ ပင်ကြား(၁-၁.၅)ပေထား၍ စိုက်ပျိုးနိုင်သည်။
ရုံးပတီသီးများကို စိုက်ပျိုးပြီး(၂)လခန့်အကြာတွင် ပထမဉီးဆုံးအကြိမ်စတင်ခူးဆွတ်နိုင်ပါသည်။ အာဟာရဓာတ်အပြည့်ရရှိရန် အသီးတောင့်(၂-၄)လက်မအရွယ်တွင် ခူးဆွတ်ရမည်။ ရုံးပတီသီးကို တစ်ရက်ခြားတစ်ခါ ခူးဆွတ်ပါ။ ပထမဆုံးအသီးတောင့်ခူးဆွတ်ပြီးချိန်တွင် အောက်ခြေရှိအရွက်များအား ဖယ်ရှားပေးရမည်။ ရုံးပတီသီးကိုစားသုံးပေးခြင်းဖြင့် အာဟာရဓာတ်များစွာကိုလည်း ရရှိနိုင်ပါသည်။ ရုံးပတီသီးတွင် ခန္ဓာကိုယ်အတွက်နေ့စဉ်လိုအပ်သော အမျှင်ဓာတ်များ ကြွယ်ဝစွာပါဝင်နေပြီး သဘာဝ ဝမ်းနှုတ်ဆေးတစ်ခုဟုပင် သတ်မှတ်ရပေမည်။ ထို့အပြင် အဆာခံနိုင်ခြင်း၊ ပင်ပန်းမှုဒဏ်များမှလည်း သက်သာစေနိုင်ခြင်း၊ အစာကြေချက်နိုင်စွမ်းကို တိုးစေနိုင်ခြင်း၊ အမြင်အာရုံတိုးတက်ကောင်းမွန်စေနိုင် ခြင်း၊ အရေပြားကိုကျန်းမာစေနိုင်ခြင်း၊ ကိုယ်ခံအားစနစ် တိုးတက်ကောင်းမွန်စေနိုင်ခြင်း စသည့် ကျန်းမာရေးအကျိုးကျေးဇူးများကိုရရှိစေနိုင်ပါသည်။
DOCA (ပဲခူး)