ဆီထွက်သီးနှံနေကြာစိုက်ပျိုးရေးနှင့် ပျားမွေးမြူရေးလုပ်ငန်း၏ အကျိုးကျေးဇူးရရှိမှု

        မြန်မာနိုင်ငံသည် စိုက်ပျိုးရေးကို အဓိကအခြေခံထားသော နိုင်ငံတစ်နိုင်ငံဖြစ်ပြီး စားသုံးဆီဖူလုံရေး၊ ပြည်သူတို့၏ စားဝတ်နေရေး တိုးတက်ရေးနှင့် ကျေးလက်ဒေသဝင်ငွေမြင့်မားရေးတို့အတွက် ဆီထွက်သီးနှံများ စိုက်ပျိုးထုတ်လုပ်မှုကို အထူးအလေးထား ဆောင်ရွက်လျက်ရှိသည်။ ထိုဆီထွက်သီးနှံများအနက် နေကြာသည် အာဟာရပြည့်ဝသော ဆီထွက်သီးနှံတစ်မျိုးဖြစ်ပြီး ရာသီဥတုနှင့် မြေအမျိုးအစားများစွာတွင် စိုက်ပျိုးနိုင်သည့်အပြင် စိုက်ပျိုးကုန်ကျစရိတ်သက်သာပြီး အကျိုးအမြတ်ကောင်းသော သီးနှံတစ်မျိုးဖြစ်သည်။

           ထို့အပြင် ပျားမွေးမြူရေးလုပ်ငန်းသည်လည်း ကျေးလက်နေပြည်သူများအတွက် အပိုဝင်ငွေရရှိစေသည့် လုပ်ငန်းတစ်ခုဖြစ်ပြီး ပျားရည်၊ ပျားဖယောင်းနှင့် အခြားပျားထွက်ပစ္စည်းများမှ စီးပွားရေးအကျိုးကျေးဇူးများစွာ ရရှိစေသည်။ နေကြာစိုက်ပျိုးရေးနှင့် ပျားမွေးမြူရေးလုပ်ငန်းတို့ သည် သီးခြားလုပ်ကိုင်နိုင်သည့် လုပ်ငန်းများသာမက အပြန်အလှန် အကျိုးပြုနိုင်သော လုပ်ငန်းနှစ်ခုလည်းဖြစ်ကြသည်။ ထိုလုပ်ငန်းနှစ်ခုကို ပေါင်းစပ်ဆောင်ရွက်ခြင်းဖြင့် စိုက်ပျိုးထုတ်လုပ်မှု တိုးတက်လာသကဲ့သို့ ပျားမွေးမြူရေးမှလည်း ဝင်ငွေတိုးတက်လာစေသည်။

နေကြာစိုက်ပျိုးရေး၏ အရေးပါမှု

        နေကြာသည် ဆီပါဝင်မှုမြင့်မားပြီး ကျန်းမာရေးနှင့်ညီညွတ်သော ဟင်းသီးဟင်းရွက်ဆီ ထုတ်လုပ်နိုင်သည့် သီးနှံဖြစ်သည်။ နေကြာဆီတွင် ခန္ဓာကိုယ်အတွက် အကျိုးရှိသော အဆီဓာတ်များ ပါဝင်သောကြောင့် ပြည်တွင်းစားသုံးမှုအတွက်သာမက စီးပွားရေးအရလည်း အရေးပါသည်။ နေကြာပင်၏ ပန်းပွင့်များသည် အဝါရောင်တောက်ပပြီး ပန်းဝတ်ရည်အရည်နှင့် ပန်းဝတ်မှုန်များ ပေါများစွာထွက်ရှိသည့်အတွက် ပျားများအလွန်နှစ်သက်သည့် အပင်တစ်မျိုးဖြစ်သည်။ နေကြာပန်းပွင့်ချိန်တွင် ပျားများသည် ပန်းပွင့်တစ်ပွင့်မှ အခြားပန်းတစ်ပွင့်သို့ သွားလာကာ ဝတ်ရည်စုပ်ယူကြပြီး ထိုဖြစ်စဉ်မှတစ်ဆင့် ပန်းဝတ်မှုန်ကူးခြင်းကို ဆောင်ရွက်ပေးကြသည်။ ထို့ကြောင့် နေကြာပင်များတွင် အသီးတင်နှုန်း မြင့်မားလာပြီး အစေ့အရည်အသွေး ကောင်းမွန်လာစေသည်။

ပျားမွေးမြူရေးလုပ်ငန်း၏ အရေးပါမှု

     ပျားမွေးမြူရေးလုပ်ငန်းသည် မြေယာအကျယ်အဝန်းများစွာ မလိုအပ်ဘဲ လုပ်ကိုင်နိုင်သည့် အသက်မွေးဝမ်းကျောင်းလုပ်ငန်းတစ်ခုဖြစ်သည်။ ပျားရည်သည် အာဟာရဓာတ်များစွာပါဝင်သော သဘာဝအစားအစာဖြစ်ပြီး ဆေးဖက်ဝင်ပစ္စည်းအဖြစ်လည်း အသုံးပြုကြသည်။ ထို့အပြင် ပျားဖယောင်း၊ ပျားပေါင်မုန့်၊ ပျားအဆိပ်ရည် စသည့် ထွက်ကုန်များမှလည်း ဝင်ငွေရရှိနိုင်သည်။

           ပျားများသည် သဘာဝပတ်ဝန်းကျင်အတွက် အလွန်အရေးပါသည့် ပိုးမွှားမျိုးဖြစ်ပြီး စိုက်ပျိုးသီးနှံများ၏ ပန်းဝတ်မှုန်ကူးလုပ်ငန်းစဉ်တွင် အဓိကအခန်းကဏ္ဍမှ ပါဝင်ကြသည်။ ပျားများမရှိပါက သီးနှံအများအပြား၏ အသီးတင်နှုန်း ကျဆင်းလာနိုင်ပြီး စိုက်ပျိုးထုတ်လုပ်မှုလည်း လျော့နည်းသွားနိုင်သည်။

(၁) နေကြာပင်များအတွက် အကျိုးကျေးဇူး

        ပျားများသည် နေကြာပန်းများပေါ်တွင် ပန်းဝတ်ရည်စုပ်ယူစဉ် ပန်းဝတ်မှုန်ကူးပေးသောကြောင့် နေကြာပင်များ၏ မျိုးအောင်နှုန်း မြင့်တက်လာသည်။ ထိုကြောင့် အသီးတင်နှုန်းပိုမို ကောင်းမွန်လာပြီး နေကြာအစေ့ အရေအတွက်နှင့် အလေးချိန်တိုးလာစေသည်။ ပျားများဖြင့် ပန်းဝတ်မှုန်ကူးမှုကောင်းမွန်သည့် နေကြာခင်းများတွင် သီးနှံအထွက်နှုန်း ပိုမိုမြင့်မားလာကြောင်း လေ့လာချက်များတွင် တွေ့ရှိရသည်။ ထို့အပြင် အစေ့အဆန်ပြည့်ဝမှု ကောင်းမွန်လာသဖြင့် ဆီထုတ်လုပ်မှုနှုန်းလည်း တိုးတက်လာသည်။

(၂) ပျားမွေးမြူရေးအတွက် အကျိုးကျေးဇူး

         နေကြာပန်းများသည် ပျားများအတွက် အစာအရင်းအမြစ်ကောင်းတစ်ခုဖြစ်သည်။ နေကြာပန်းပွင့်ချိန်တွင် ပျားများသည် ပန်းဝတ်ရည်နှင့် ပန်းဝတ်မှုန်များကို ပေါများစွာရရှိနိုင်သဖြင့် ပျားရည်ထုတ်လုပ်မှု တိုးတက်လာသည်။ နေကြာပျားရည်သည် အရသာကောင်းမွန်ပြီး အရောင်လှပသည့်အတွက် ဈေးကွက်ဝင်သော ပျားရည်အမျိုးအစားတစ်ခုဖြစ်သည်။ ထို့ကြောင့် ပျားမွေးမြူသူများအတွက် ဝင်ငွေတိုးတက်စေပြီး အသက်မွေးဝမ်းကျောင်း အဆင်ပြေစေသည်။

(၃) သဘာဝပတ်ဝန်းကျင်အတွက် အကျိုးကျေးဇူး

        နေကြာစိုက်ပျိုးရေးနှင့် ပျားမွေးမြူရေးကို ပေါင်းစပ်ဆောင်ရွက်ခြင်းသည် သဘာဝပတ်ဝန်းကျင်ထိန်းသိမ်းရေးအတွက်လည်း အကျိုးရှိသည်။ ပျားများသည် အခြားသီးနှံများနှင့် တောပင်များ၏ ပန်းဝတ်မှုန်ကူးခြင်းကိုပါ ဆောင်ရွက်ပေးသောကြောင့် ဇီဝမျိုးစုံမျိုးကွဲများ တည်တံ့စေရန် အထောက်အကူပြုသည်။ ထို့အပြင် ဓာတုပိုးသတ်ဆေးများကို အလွန်အကျွံအသုံးပြုပါက ပျားများသေဆုံးနိုင်သဖြင့် တောင်သူများသည် သဘာဝပတ်ဝန်းကျင်နှင့် ကိုက်ညီသော စိုက်ပျိုးနည်းစနစ်များကို ပိုမိုအသုံးပြုလာကြသည်။ ထိုကြောင့် မြေဆီလွှာနှင့် သဘာဝပတ်ဝန်းကျင် ထိခိုက်မှု လျော့နည်းလာစေသည်။

လိုက်နာသင့်သည့် အချက်များ

နေကြာစိုက်ပျိုးရေးနှင့် ပျားမွေးမြူရေးလုပ်ငန်းတို့ကို ပေါင်းစပ်ဆောင်ရွက်ရာတွင် အောက်ပါ အချက်များကို အထူးဂရုပြုသင့်သည်-

(က) ပျားအုံများကို နေကြာခင်းအနီးတွင် သင့်တော်သောအကွာအဝေးဖြင့် ထားရှိရမည်။

(ခ) ပန်းပွင့်ချိန်တွင် ဓာတုပိုးသတ်ဆေးများ အသုံးပြုခြင်းကို ရှောင်ကြဉ်သင့်သည်။

(ဂ)အသုံးပြုမည်ဆိုပါက ပျားများအတွက် အန္တရာယ်နည်းသော ဆေးများကိုသာ  ရွေးချယ်အသုံး ပြုသင့်သည်။

(ဃ) ပျားများအတွက် သန့်ရှင်းသော ရေအရင်းအမြစ်များ ထားရှိပေးသင့်သည်။

(င)စိုက်ပျိုးရေးနှင့် မွေးမြူရေးပညာပေး သင်တန်းများ တက်ရောက်ကာ နည်းပညာများ လေ့လာ သင့်သည်။

စီးပွားရေးနှင့် လူမှုရေးအကျိုးသက်ရောက်မှု

          နေကြာစိုက်ပျိုးရေးနှင့် ပျားမွေးမြူရေး ပေါင်းစပ်လုပ်ကိုင်ခြင်းသည် တောင်သူများ၏ ဝင်ငွေကို မျိုးစုံရရှိစေသည်။ နေကြာမှ ဆီထွက်သီးနှံအကျိုးအမြတ်ရရှိသကဲ့သို့ ပျားရည်နှင့် ပျားထွက် ပစ္စည်းများမှလည်း ထပ်မံဝင်ငွေ ရရှိနိုင်သည်။ ထို့အပြင် ကျေးလက်ဒေသများတွင် အလုပ်အကိုင် အခွင့်အလမ်းများ ပိုမိုဖန်တီးပေးနိုင်ပြီး လူမှုစီးပွားဘဝ တိုးတက်လာစေသည်။ မိသားစုဝင်ငွေ တိုးလာခြင်းကြောင့် ပညာရေး၊ ကျန်းမာရေးနှင့် လူမှုဖူလုံရေးဆိုင်ရာ ကဏ္ဍများတွင်လည်း တိုးတက်မှုများ ဖြစ်ပေါ်လာနိုင်သည်။

နိဂုံး

        ဆီထွက်သီးနှံနေကြာစိုက်ပျိုးရေးနှင့် ပျားမွေးမြူရေးလုပ်ငန်းတို့သည် အပြန်အလှန်အကျိုးပြုသော လုပ်ငန်းများဖြစ်ကြသည်။ ပျားများသည် နေကြာပင်များ၏ ပန်းဝတ်မှုန်ကူးခြင်းကို ကူညီပေးသဖြင့် သီးနှံအထွက်နှုန်းနှင့် အရည်အသွေး တိုးတက်လာစေသည်။ တစ်ဖက်တွင်လည်း နေကြာပန်းများသည် ပျားများအတွက် အစာအရင်းအမြစ်ကောင်းများ ပံ့ပိုးပေးသဖြင့် ပျားရည်ထုတ်လုပ်မှု တိုးတက်လာစေသည်။

           ထို့ကြောင့် နေကြာစိုက်ပျိုးရေးနှင့် ပျားမွေးမြူရေးကို ပေါင်းစပ်ဆောင်ရွက်ခြင်းသည် စိုက်ပျိုးရေးဖွံ့ဖြိုးတိုးတက်ရေး၊ စားသုံးဆီဖူလုံရေး၊ သဘာဝပတ်ဝန်းကျင်ထိန်းသိမ်းရေးနှင့် ကျေးလက်နေပြည်သူများ၏ လူမှုစီးပွားဘဝ တိုးတက်ရေးအတွက် အရေးပါသော နည်းလမ်းတစ်ခုဖြစ်ကြောင်း တင်ပြလိုပါသည်။

              ပျားမွေးမြူရေးသည် တောင်သူများအတွက် အမြတ်အစွန်းနှင့် အကျိုးကျေးဇူးများစွာပါဝင်သော လုပ်ငန်းတစ်ခုဖြစ်သည်။ သဘာဝနှင့်ညီညွတ်ပြီး မိမိလယ်ယာလုပ်ငန်းနှင့် တွဲဖက်ပြုလုပ်နိုင်သည်။ ထို့ကြောင့် တောင်သူများသည် ပျားမွေးမြူရေး စတင်ပြုလုပ်ရန် စဉ်းစားသင့်ပါသည်။ ပျားမွေးမြူရေးသည် သဘာဝနှင့်ညီညွှတ်ပြီး၊ မိမိလယ်ယာလုပ်ငန်းနှင့် တွဲဖက်ပြုလုပ်နိုင်သော ရင်းနှီးမြှုပ်နှံမှုနည်းသည့် လုပ်ငန်းတစ်ခုဖြစ်သည်။ မိမိစိုက်ပျိုးရေးလုပ်ငန်းကို တိုးတက်စေရန်နှင့် ဝင်ငွေရရှိမှုများပြားစေရန် ပျားမွေးမြူရေးကို ထည့်သွင်းလုပ်ကိုင်ရန် စဉ်းစားသင့်ကြောင်း ရေးသားတင်ပြလိုပါသည်။

DOCA(စစ်ကိုင်း)